انهارده بإذن الله هنشرح كل حاجة تخص الـ Title tag وكمان هنقدملك 15 نصيحة لكتابة عنوان فريد Unique Title بشكل إحترافي لكلاً من محركات البحث SEO و العملاء المحتملين
ودا فهرس مختصر لكل النقاط اللي هنتكلم عليها في مقالنا :
ما هو الـ Title Tag .
الأماكن اللي بيظهر فيها تاج العنوان Title Tag .
إزاي أقدر أضيف الـ Title Tag إلي الموقع / الصفحة / المقال .
أهمية الـ Title Tag في عملية الفهرسة Indexing لمحركات البحث .
أهمية الـ Title Tag للمستخدمين أو للعملاء المحتملين) .
الأضرار الناتجة عن الإهمال في كتابة العنوان Title بشكل إحترافي لمحركات البحث .
الأضرار الناتجة عن الإهمال في كتابة "العنوان" للمستخدمين .
هل Google يقدر يغير العنوان Title ؟
الأسباب اللي ممكن تخلي Google يغير العنوان .
الطرق المختلفة لمنع جوجل من تغيير العنوان .
أكثر الأشياء اللي بتلفت إنتباه الباحثين أو العملاء في العنوان Title .
15 نصيحة لكتابة عنوان فريد Unique Title بشكل إحترافي لكلاً من محركات البحث SEO و العملاء المحتملين .
ما هو الـ Title Tag
الـ Title له أكتر من مسمي في مجال الـ Digital Marketing , يعني ممكن تقول عليه : SEO Title – Page Title – Meta Title – Title Tag لكن معني الـ Title هو واحد سواء كان معناه لمحركات البحث Search Engines أو معناه للمستخدمين Users .
مفهوم الـ Title بالنسبة لمحركات البحث " SEO Title " : هو المصدر اللي بتعرف من خلاله محركات البحث أو الـ robots مضمون صفحتك أو مقالتك , ذي بالظبط " عنوان الكتاب " أو "إسم الفيلم" , في مثل بيقول " الجواب بيبان من عنوانه " , هل تقدر تعرف اي اللى بيدور حواليه محتوي الكتاب أو الفيلم من غير ما تقرأ العنوان أو تتفرج علي الفيلم ؟ , اكيد مستحيل , إلا في حالة لو انت فتحت الكتاب وبدأت تقرأ عشان خاطر توصل لمضمون الكتاب أو إنك تسمع الفيلم , وفي الحالة دي إنت اللي هيبقي ليك القرار في إنك تحط العنوان اللي شايفه مناسب من وجهة نظرك لمحتوي الكتاب أو مضمون الفيلم , وخلوا بالكم كويس جدا من نقطة "انت اللى هتحط العنوان بنفسك" عشان هنحتاجها معانا قدام شوية .
مفهوم الـ Title للمستخدمين Users Title : وأنا شخصيا بفضل جملة "مفهوم الـ Title للعملاء المحتملين" عن "مفهوم الـ Title للمستخدمين" في مجال التسويق الإلكتروني . الـ Title هو أول مكان بيقع عليه عين العملاء المحتملين , ومدي جودة الـ Clickbait هي اللي بتتحكم في CTR . طبعا ممكن تكون عارف يعني اي CTR , لكن أكيد بتسأل عن ما هو الـ Clickbait ؟
كمل قراءة المقال وهتلاقي توضيح وشرح لكل حاجة بالتفصيل سواء للـ CTR أو لـ Clickbait ...
خلينا نفترض انك فتحت Google وكتبت اي كلمة في مربع البحث Search Box , فأكيد هتظهرلك صفحة فيها 10 نتائج , الصفحة دي اسمها SERP يعني صفحات نتائج محركات البحث , وهي إختصار لـ (Search Engine Results Pages) , لكن السؤال هنا ...
اى نتيجة من الـ 10 نتائج هتختار إنك تضغط عليها ؟ أكيد النتيجة اللي هتلاقي في " عنوانها - Title " أو "وصفها - Description" إجابة واضحة أو معلومات مفيدة لكلمة بحثك , لكن هنا مفيش اي اختلاف مابينا علي انك أول حاجة هتقع عينك عليها هي الـ Title , وهو العامل الأكثر تأثيراً في قرار الضغط علي النتيجة من عدم الضغط , اللي إحنا قولنا عليه فوق الـ CTR وهو إختصار لـ (Click-through rate ) بمعني ( نسبة النقر إلي الظهور) .
ممكن يكون عندك موقع إلكتروني أو مدونة , وفيها محتوي جيد جداً بيدور حول موضوع معين , لكنك واصف محتوي الموقع أو المدونة من خلال الـ Title أو الـ Description بطريقة ضعيفة , غير جذابة , مش موضحة المحتوي , وبالتالي لما هتظهر في الـ SERP بالعنوان والوصف الضعيف اللي مش موضح المحتوي , أكيد نسبة النقر علي موقعك هتبقي ضعيفة جداً , فخلي بالك كويس جداً , إن ممكن يكون سبب الفشل / ضعف الزيارات لصفحتك أو مقالك هو الـ Title قبل الـ Description كمان .
الأماكن اللي بيظهر فيها العنوان " Title Tag "
ننتقل لنقطة تانية وهي الأماكن اللي بيظهر فيها الـ Title Tag . في 4 أماكن بيظهر فيهم الـ Title للمستخدمين :
أولا : بيظهر الـ Title في الـ Browsers Tabs .
أكيد كلنا لما بنستخدم المتصفح Browser بنبقي فاتحين أكتر من Tab , في كل Tab هتلاقي الـ Title اللي بيشرح الصفحة , وطبعاً دا له أهمية كبيرة جداً خاصة لما بتكون فاتح أكتر من Tab , لأنه ببساطه بيعرفك اي محتوي الصفحة , فمن خلاله أقدر أكرر إذا كنت هقفل الـ Tab ولا لا .
ثانيأً : بيظهر الـ Title في صفحة نتائج محركات البحث SERP .
وهو دا أهم مكان يهمنا إنهارده , لان الـ SERP هو أهم وأكبر مكان أقدر احصل منه علي آلاف الزيارات لصفحتي أو موقعي الإلكتروني , ومش زيارات عادية , لا طبعا , لأن طبيعة أغلب زوار محرك البحث بيتميزوا بإنهم واخدين قرار الشراء أو التعامل مع الخدمة بنسبة كبيرة جداً , وبالتالي هما بيبقوا في مرحلة التفاضل والإختيار .
تخيل بقي إنك بسبب إهمالك للـ Title خسرت كل العملاء اللي كانوا في طريقهم لإتمام صفقة معاك !! , ودا طبعا لإن أول حاجة بتقع عين العملاء عليه هو الـ Title Tag .
ثالثاُ : بيظهر الـ Title في مشاركات الـ Social Media .
وذي ما إنت شايف .. إن كل اللي بيظهر لما تيجي تشارك رابط موقعك أو رابط مقالك علي السوشيال ميديا هو " الصورة الرمزية - URL - Title – Description " , ودا طبعا بيختلف حسب الـ Plugin المضافة لموقعك . ولكن لو ركزنا كويس هتلاقي إن الـ Title واخد مساحة كبيرة وكمان مميز , لأن هو الأداة اللي من خلالها نقدر نلفت ونجذب إنتباه العملاء للمحتوي اللي بيوصفه العنوان .
ولو قابلتك أي مشاكل في طريقة عرض الرابط علي السوشيال ميديا فتقدر تستخدم الآدوات دي : آداة Debug لموقع Facebook : الآداة دي بتجبر الفيسبوك علي إعادة الزحف لصفحتك أو موقعك وبتصحح أخطاء المشاركة https://developers.facebook.com/tools/debug
آداة Post Inspector لموقع LinkedIn :
https://www.linkedin.com/post-inspector
آداة Validator لموقع Twitter : https://cards-dev.twitter.com/validator
رابعاً : بيظهر الـ Title في الإشارات المرجعية Browser Bookmarks .
دايما لما بنفتح موقع معين ونحس إنه مهم جداً وفيه محتوي يستاهل المتابعة , بنحفظه في الـ Bookmarks , وأول ما بتضغط علي علامة الـ Bookmark بيظهرلك مربع , وبتلاقي تلقائيا مكتوب بجوار الـ Name العنوان Title , فلازم تهتم جداً بكتابة الـ Title بشكل إحترافي ودا اللي هنوضحة في الكلام اللي جاي .
هتكمل معايه ولا فصلت مني ؟
اللي جاي أهم من اللي فات
نكمل ....
إزاي أقدر أضيف الـ Title Tag إلي الموقع / الصفحة / المقال
نيجي بقي للنقطة اللي بعد كدا وهي ازاي اضيف الـ Title للموقع أو المدونة أو الصفحة ؟
الطريقة الأولي : إنك تطلب من المبرمج اللي مصمملك الموقع انه يضيف ليك في لوحة التحكم Control Panel مكان تقدر تضيف فيه لكل صفحة أو مقال الـ Title الخاص بيه , أو إنك تبعتله محتوي الـ Title لكل صفحة من صفحات الموقع الإلكتروني وهو يضيفة داخل الأكواد , ودا في حالة ان الموقع مالوش لوحة تحكم Static Website .
الطريقة الثانية : إنك تكون اللي مصمم ومبرمج الموقع وعندك خلفية عن الأكواد Codes.
الأماكن اللي بيتم وضع Title Tag فيها :
أولا : في قسم الـ <Head> في شفرة HTML .
ثانيا : في الإعدادات العامة General settings اذا كنت بتستخدم CMS أنظمة إدارة المحتوي , وهي إختصار لـ (Content Management Systems ) بما في ذلك الـ WordPress .
ثالثاً : إذا كنت بتستخدم مكون إضافي للسيو SEO plug-in ذي إضافات Yoast فتقدر تضيف الـ Title tag في قسم الـ SEO Title , وكمان تقدر تشوف معاينة لطريقة ظهور موقعك أو صفحتك علي محركات البحث , ولما تكون بتكتب مقالة فساعتها الـ Headline هيحل محل الـ Title Tag .
أهمية الـ Title Tag لكلاً من ( محركات البحث SEO – للمستخدمين / العملاء المحتملين Users )
اتكلمنا في اول المقال عن بعض مميزات وأهمية الـ Title Tag , ودلوقتي هنكمل معاكم بالتفصيل أهمية " العنوان " سواء للـ Robots أو للـ Users :
1-- من خلال الـ Title تقدر تجذب أكبر عدد ممكن من المشاركات علي مواقع السوشيال ميديا , واتكلمنا علي الموضوع دا في أول المقال وشرحنا إن " العنوان " أكثر حاجة بتجذب وبتلفت النظر لما بتيجي تشارك موقعك أو مقالك علي منصات التواصل الإجتماعي .
وفي " إضافة " جميلة جداً إسمها Open Graph Preview من Google Chrome بتقدر تعرف من خلالها شكل موقعك لما تيجي تشاركة علي السوشيال ميديا وخاصة الـ Facebook و Twitter .
ودا رابط تحميل الإضافة من الكروم https://chrome.google.com/webstore/detail/open-graph-preview/ehaigphokkgebnmdiicabhjhddkaekgh
2- تقدر من خلاله تنبه المستخدمين بمحتوي صفحتك أو موقعك من خلال الـ Browsers Tab أو من خلال الـ Bookmarks .
3- الـ Title أول حاجة بيقابلها الـ Robots في عملية الزحف Crawling , واللي من خلاله بتتعرف عناكب محركات البحث علي مضمون ومحتوي الصفحة أو المقال .
4- الـ Title Tag من أهم الأماكن اللي تقدر تستغلها في توزيع الكلمات الرئيسية Keywords .
5- الـ Title Tag إشارة من إشارات الترتيب Ranking Signal اللي بيتم التصنيف بناءاً عليها من قبل محركات البحث , ودا أكد عليه مقالات كتيير في موقع MOZ .
6- هو المتحكم رقم واحد في نسبة النقر إلي الظهور CTR , لأن ذي ما شرحنا قبل كدا إن أول سطر بيظهر للباحثين في صفحة نتائج البحث SERP هو الـ Title , وبالتالي لو " العنوان " جذب الباحث وكان مكتوب بشكل إحترافي وشارح محتوي الصفحة أو الرابط أكيد المستخدم أو الباحث هيضغط علي الرابط عشان يقرأ المحتوي , والعكس .
الأضرار الناتجة عن الإهمال في كتابة Title Tag بشكل إحترافي , سواء لمحركات البحث أو للمستخدمين / العملاء المحتملين
هنا هنتكلم عن الضرر اللي هيعود عليك من الإهمال في كتابة الـ Title أو نسيان كتابة " العنوان " لصفحتك بالنسبة لكلاً من الـ SEO و الـ Users.
بالنسبة للـ SEO : أول حاجة كدا إنك خسرت الـ Ranking Signal . ثانياً خسرت أهم مكان من أماكن توزيع الكلمات الرئيسية . ثالثاً هتتسبب في إرتفاع نسبة الـ Bounce Rate لصفحتك . رابعاً هيتأخر ترتيبك في الـ SERP بطريقة غير مباشرة .
وخلينا نسأل أكتر من سؤال .. هل Google يقدر يغير العنوان Title لصفحتك أو موقعك ؟ طبعاً مسموح لجوجل انه يغير عنوان موقعك أو صفحتك في صفحة نتائج البحث , ودا بيوضح لنا من خلال مؤتمرات شركة Google , تعالوا نشوف بيقولوا اي ....
Aaseesh Marina من شركة Google بيقول إن لو عندنا Anchor Text في موقع A بيشاور علي موقع B , جوجل ممكن تختار نص المرساه دا اللي هو الـ Anchor Text كعنوان Title لنتائج البحث إذا اعتقدوا أنه عنوان جيد , أو أفضل من الـ Title الموجود .
وكمان Gary Illyes من شركة Google بيقول "إننا لن نقدم طرقاً لمنع إعادة كتابة الـ Title Tag , وذلك لأننا نتوقع أن يساء إستخدام تلك الطرق , علي سبيل المثال ( حشو الكلمات المفتاحية Keywords Stuffing )" .
إذا نخرج من الكلام دا بإن Google تقدر تغير الـ Title Tag .
جميل جداً .
وياتري اي الأسباب اللي ممكن تخلي Google يغير " العنوان " ؟ أولاً : إنك ما تعملش من الآساس Title Tag لصفحتك أو موقعك . ثانيا : في 2016 لما سئل Gary Illyes من شركة Google عن إعادة كتابة عناوين الصفحات Title , قال بإختصار إن " لا يبذل الكل جهداّ كبيرا في كتابة عناوين الصفحات Title , والبعض يتركه فارغاً , وهذا لا يجعلنا نقدم نتائج مفيدة للباحثين / المستخدمين " . ثالثاً : يقول Gary Illyes أن جوجل تعتقد أن هناك " عناوين " أكثر ملائمة لطلب بحث معين , وأن جوجل لا تعيد دائماً كتابة العناوين , بل إنها تعتمد علي إستعلامات البحث , والعناوين السلبية مثل " home - profile " , لذلك نحن نعمل علي تقديم الأفضل .
وازاي اقدر أمنع جوجل من تغيير الـ Title ؟ مانقدرش نقول إنك ممكن تمنع جوجل إنه يغير الـ Title بنسبة 100% , لكن نقدر نقول إنك ممكن تمنعه بنسبة 90% . أولا : خلي الـ Title مرتبط بصفحتك أو مقالك , وبمعني آخر , خليه يوصف مضمون الصفحة أو المشاركة بدقة وبوضوح . ثانياً : خلي الـ Title يجاوب علي إستعلام البحث , وضح من خلاله " ما يريد الناس رؤيته " . ثالثاً : خلي " العنوان " يجذب ويشد الإنتباه , عشان تقدر تحصل علي نقرات كتيير , وبالتالي تثبت إن عنوانك ملائم ومناسب لمحتوي صفحتك .
بالنسبة للـ Users : كفاية أوي انك تكون طالع في أول النتائج في الصفحة الأولي ولكن مفيش عملاء بيضغطوا علي نتيجتك أو رابط موقعك , وبالتالي مفيش زيارات , وبالتالي ترتيبك هيتراجع . David Ogilvy بيقول إن 8 من أصل 10 (يقرؤون العنوان) .
اي رأيك ؟ مبسوط كدا ؟
بالله عليك خلي بالك من الـ Title شوية واهتم بيه وبلاش مشاكل مع جوجل والعملاء كمان .
أكثر 5 حاجات بتلفت إنتباه الباحثين أو العملاء في العنوان Title .
أولاً : الناس بتحب المعلومات الدقيقة والجديدة . ثانياً : الأرقام والكمية . ثالثاً : الإختصار مع الشمولية . رابعاً : التفاصيل , وخاصة المتاجر الإلكترونية , ذي ... التواريخ – السعر – الخامة – حالة المنتج . خامساَ : العلامة التجارية , أكتب علامتك التجارية في آخر الـ Title بس طبعاً دا في حالة إذا كانت علامة تجارية مشهورة وليها قبول ومصداقية عند الناس .
ازاي اكتب Title إحترافي لمحركات البحث SEO وللعملاء المحتملين 15 نصيحة لكتابة عنوان فريد Unique Title بشكل إحترافي لكلاً من محركات البحث SEO و المستخدمين Users ؟
1- بالنسبة لعدد وحالة الأحرف , لازم يكون عدد حروف الـ Title أقل من 60 حرف بما فيهم المسافات , وإلا هيضطر جوجل إنه يقص " العنوان " ويكمل بالنقط بالشكل دا ("...") , دا غير إنه ممكن يحذف أو يقص كلمة تكون مهمة فيأثر علي جاذبية العنوان .
ولو هنتكلم عن عدد الحروف بالظبط , يبقي المفروض نقول ( Title Width ) , وطبعاً Google بيقص العنوان اللي أكبر من 600 بيكسل , علي الرغم ان في إختلافات بين الأجهزة .
طيب إزاي احسب الـ 600 بيكسل , العملية صعبه جدا ومتعبه , والأفضل من العملية الحسابية إنك تاخد " العنوان " وتضيفه في اي موقع من المواقع دي , وهو هيحسبلك لوحده Title Width , والمواقع دي كمان بتحسبلك الـ URL وكمان الـ Descriptions , واللي هنتكلم عنهم بالتفصيل في مقالات تانية .
https://searchwilderness.com/tools/pixel-length https://www.portent.com/serp-preview-tool https://seomofo.com/snippet-optimizer.html https://serpsim.com أما بخصوص حالة الأحرف , فطبعاً الحروف الكبيرة الـ Uppercase letters بتاخد مساحة أكبر من الحروف الصغيرة Small letters , فحاول ما تستخدمهاش إلا في عند الضرورة .
طبعاً مفيش حاجة إسمها عقوبات من Google علي " العناوين الطويلة " , وأحياناً بتكون مفيدة جداً لما بنشاركها علي السوشيال ميديا , لكن عشان نضرب عصفورين بحجر واحد خلينا تحت الـ 60 حرف أو أقل من 600 Pixels .
2- لازم عنوان صفحتك أو موقعك يحتوي علي الكلمات الدلالية Keywords , وطبعاً يفضل بنسبة كبيرة جداً إنها تكون في بداية الـ Title , ولو حبيت تضيف اسم الشركة أو العلامة التجارية يبقي يكون في آخر " العنوان " , واوعي تكرر الكلمة الدلالية لأن دا اسمه "حشو الكلمات" Keywords Stuffing وكمان ذي ما ذكرنا في المقال إن جوجل ممكن تغير العنوان لو عملت حشو للكلمة الرئيسية , لكن Google مابتعاقبش علي حشو الكلمات في العنوان في الخوارزميات الخاصة بها , لكن دا ما يمنعش إن تغيير العنوان مش في صالحنا علي الإطلاق . وكمان الكلمة الدلالية Keywords تكون من 2 : 5 كلمات .
3- إبعد عن الكلمات الوقفية Stop Words , ذي ( مع – الي – في – أو – علي – من .... ) , لأنها بتاخد مساحة من عرض الـ Title , إلا في الحالات اللي ممكن الكلمات دي تغير المعني لو حذفتها , وكمان عن علامات الترقيم .
4- خلي لكل صفحة في موقعك عنوان فريد Unique Title وخاص بيها , بيشرح محتواها بإختصار , وابعد عن العناوين العامة اللي ذكرتها Google ذي ( الصفحة الرئيسية – الملف الشخصي ..... ) لأن العناوين العامة بتخلي محركات البحث تفتكر إن في محتوي مكرر , والكلام دا مهم جداً جداً لمواقع التجارة الالكترونية عشان بيكون فيها مئات وآلاف المنتجات اللي بتشبه بعضها , وساعتها حاول تفرق بين كل عنوان صفحة والتاني من خلال مواصفات كل منتج ذي ( السعر – الخامة – الحجم – سنة الصنع – حالة المنتج – بلد المنشأ - العنوان ....) , المهم إنك تحاول تبعد عن أي سوء فهم ممكن يحصل بينك وبين محركات البحث .
5- إستخدم الـ Action Words , استخدم كلمات تعبر عن إجراء معين , ذي بالظبط الـ Call To Action في المحتوي , ( احصل علي – تعلم – اصنع ...)
6- لازم تكون رابط ما بين الـ Title و Description و Content عشان ما يحصلش Bounce Rate , بمعني إن عنوانك يكون واصف محتوي الصفحة كويس جدا ويكون الوصف مكمل للعنوان وموضح أو مفسر له , لازم يكون في ارتباط وعلاقة ما بينهم , لإن الباحث لو ضغط علي رابط صفحتك وملقاش علاقة بين ( العنوان + الوصف ) و( المحتوي ) هيقفل الموقع من غير ما يكمل قراءة , وبالتالي هيسبب " معدل ارتداد " اللى هو الـ Bounce Rate .
7- لازم يكون " العنوان " موضح للعميل / الباحث اي اللي ممكن يتوقعه لما يضغط علي الرابط .
8- أفضل تنسيق للـ Title هو : Primary Keyword | Secondary Keyword | Brand Name Product Name | Product Category | Brand Name طبعاً لو علامتك التجارية مشهورة هتفيدك كتير جداً في الـ CTR لإنك هتقدر تحصل علي العديد من الزيارات بسببها .
ملحوظة مهمة : علي الرغم من ان في جدل كبير علي إن الـ CTR هو عامل ترتيب ولا لا , إلا إننا مانقدرش ننكر إن زيادة عدد زيارات الموقع عامل كبير جداً في الترتيب Ranking Signal , إذاً ممكن نقول بطريقة تانية إن الـ CTR عامل غير مباشر من عوامل الترتيب .
9- إحذف الكلمات المكرره , وحاول تستفيد بكل حرف من حروف "العنوان" , ومتنساش ... بلاش حشو الكلمات .
10- استخدم العباراة القصيرة بدلاً من العبارات الطويلة المعقدة , يعني لو عندك كلمتين بنفس المعني إستخدم الكلمة اللي عدد حروفها أقل .
11- اوعي يحصل عندك تكرار لعناوين الصفحات عشان ماتدخلش نفسك في صدام مع جوجل .
تقدر تستخدم آداة Screaming Forg SEO Spider , وتحط رابط موقعك , وبعدين تختار تاب Page Title وبعد كدا تختار من الـ Filter امر Duplicate , والبرنامج هيطلعلك كل العناوين المكرره علي موقعك .
ودا رابط تحميل البرنامج : https://www.screamingfrog.co.uk/seo-spider
12- لو عندك متجر إلكتروني ومنتجات كتير متشابهه , تقدر تستخدم آداة Ahrefs KW Explorer , وتدخل الكلمة الرئيسية , وبعدين تبدأ التحليل , وبعد كدا تختار Phrase Match " مطابقة العبارة " , الآداة دي تعتبر منجم ذهب , بتقدر تعرف من خلالها صيغ كتييير لكلماتك الرئيسية عشان تقدر تخرج من مشكلة تكرار الـ Title للصفحات .
كمان في تقرير من موقع Ahrefs بيثبت إن تحسين الـ Title للصفحة بيأدي إلي زيادة بنسبة 37% من حركة المرور علي شبكة الإنترنت .
13- تجنب الأخطاء الإملائية , واللي ذكرتها الكاتبة Ruth Eschenheimer في مقالها بموقع WIX .
14- خلي الـ H1 مختلف عن الـ Title Tag , ودا بيضيفلك فرص كتير لصياغة الكلمة الرئيسية وبيزود فرص ظهورها لنية البحث المختلفة .
15- ضيف لعنوانك Clickbait , ومعني الـ Clickbait Title هو " إستغلال فجوة / ثغرة الفضول عند الباحث " Curiosity Gap , إنك تخلق عند اللي هيقرأ العنوان الفضول والرغبة في معرفة المحتوي اللي خلف العنوان , وكل ما كان عنوانك مثير كل ما زاد عدد الضغطات علي الرابط وتضاعفت الزيارات لصفحتك أو موقعك , والـ Clickbait بيستخدم أكتر في التوجيه لصفحات " الدفع - التسجيل" , وأحيانا بيستخدم للمواقع الإخبارية , لكن دا مايمنعش إننا نستخدمة معانا لأي محتوي .
لحد هنا وموضوعنا إنتهي
بإذن الله المقال اللي جاي هنتكلم فيه عن الرابط " URL " والوصف " Description " بشكل مفصل . أتمني أكون قدرت أوصل لكم المعلومات بشكل بسيط , وتكونوا استفدتم ولو بمعلومة واحده جديدة .
منتظر تعليقاتكم وآرائكم حول موضوع الـ Title من خلال التعليقات !!!